Saturday, June 7, 2008

وجه تعبيري سخيف


_ يااااااه
_ ياااااااااه فعلاً
_ ايه الأخبار ؟
_ الحمد لله .. (صمت للحظات ) .. ماشي الحال
_ الحمد لله
_ ايه الأخبار ؟
_ الحمد لله .. (صمت للحظات) .. ماشي الحال
_ الحمد لله
( هزة رأس مزدوجة )
_ انت فين من فترة طويلة
_ أنا موجود من قترة طويلة
_ مبشوفكش خالص
_ جايز انا ببقا موجود في مكان غير المكان المطلوب
_ لسه بتتفزلك
_ لسه بتفزلك
_ وبتتلاعب بالألفاظ ..
_ وبتلاعب بالألفاظ
_ وبتكرر الكلام بشكل سخيف
( هزة رأس مفردة ) .. ثم :
_ بالظبط
_ بتعمل إيه الأيام دي ؟
_ بتغدى
( ضحكة مفردة ) ثم :
_ بجد ؟
_ بجد
_ لسه بتكتب ؟
_ لا .. غيرت الصنف
_ بتعمل إيه ؟
_ بشم حشيش .
( ضحكة مفردة للمرة الثانية ) ثم :
_ بتكلم جد ..
_ متقولش لحد ..
(ضحكة مزدوجة ) ثم :
_ لحظة بس .. هو الحشيش بيتشّم
_ لا طبعاً ..
_ امال انت بتقول إيه ؟
_ مبقلش
(ضحكة مفردة) ثم :
_ انت لسه قايل انك بتشم حشيش
_ انا قلت اني بشم حشيش ؟
_ آها
_ مبحبش الناس اللي بيقولوا اها .. الكون كله بقا مليان باللي بيقولوا : آها , على الماسنجر .. الأدهى انهم خرجوا للشارع , عم سعيد بقال الحارة دلوقتي بقا بيقول " آها "
_ انتوا بقال حارتكم اسمه عم سعيد ؟
_ لا .. دا زائد إني وياللعجب مش ساكن في حارة ..
_ إمال ساكن فين ؟
_ ساكن قصادي
_ بطل رخامة يا رخم
_ ساكن في حي السيدة , وحبيبي ساكن في ميلودي هيتس
_ مش هرد عليك ..
_ مش مشكلة .. المهم كلمة آها ما تظهرش قدامي ..
_ امال اقول ايه ؟
_ ايوة
_ طيب .. ايوة
_ ايوة على إيه بقا ؟
_ انك قلت انك بتشم حشيش ..
_ مبشمس ..
_ انت بقيت رخم اوي على فكرة ..
_ اها
_ انت مالك بجد ؟
_ مالي بجد ؟
_ انا بسأل ..
_ مفيش
_ انت كدا عادي يعني
_ آها
_ انت مش لسه بتقول مش عايزني اقول آها
_ انا قلت كدا ؟
_ لا بقا .. بطل رخامة بجد
_ أنا رخم ؟
_ انت مش رخم بس معرفش بتتكلم كدا ليه ؟
_ على فكرة ..
_ ها ؟
_ بجد بجد ..انا رخم
_ طيب .. عايز حاجة ؟
_ لا .. شكراً
_ سلام
_ صحيح ..
_ إيه ؟
_ مصر غلبت جيبوتي 4 / صفر.. في حين إن مالاوي غلبتها 8 .. ودي هي الحقائق الوحيدة في الكون حالياً .. ونوافيكم بالأنباء تباعاً ..
_ انت رخم بجد
_ هههههههههه .. وربنا عارف ..
_ الحوار دا مش طوّل اوي ؟
_ فعلاً .. روحي العبي فيفا , وانا هروح ألعب مورتال كومبات ..
_ هي مورتال كومبات أتعملت لعبة ؟
_ الله اعلم ..
_ امال انت رايح تعمل إيه ؟
_ بجد بجد ؟
_ آها
_ رايح العب فيفا ..
_ مش هرد عليك ..
_ أو أشم حشيش

3 comments:

ندى said...

لا رخم فعلاً
:)

المشكلة بس انك تلاقى حد يستحملك فى مرحلة الرخامة دى

ملكة said...

يادي ال..
فكرتني بالمسرحية اللي درسناها اخر نة
Waiting for Godot
كل حوار الشخصين طول المسرحية على نفس المنول
تكرار كلام
اسئلة ملهاش معنى
فلسفة وفي الغالب بتناقض نفسها
سخرية
واللي نبدأ منه نخلص عنده

بس انا اموت واعرف فين جودو اللي انتوا كنتوا مستنينه في الحوار ده كله؟؟

Anonymous said...

بصفتى واحد من الشعب وانسان من البشر
انا دمى اتحرق
بس تحفه
فين اللى تلاقيه ميهس دلوقتى كده