الثلاثاء، 29 يوليو 2008

عن الحكمة الخفية


وعندما سألني ممسكاً مبسم الشيشة العتيد , الذي تحول مع الوقت لملمح من ملامح وجهه . و بطريقة بدت لي غير مهتمة لهذه الدرجة :
_ " ومين بقا اللي لبس الموضوع , وشال الليلة دي كلها ؟ "
قلت له , بنبرة تردد بعض الشيء .. فما زالت آثار عملية قلبه الأخيرة ترمي بآثارها على كل مناقشاتنا معاً :
_ " محدش شال الليلة .. ولا حد لبس الموضوع .. خدوا براءة "
توقعت أن يلتفت لي حتى , لكنه قال في منتهى الهدوء :
_ " كلهم خدوا براءة ؟ "
_ " كلهم .. "
_ " والناس اللي غرقوا في العبّارة دول ؟ "
_ " هياخدوا تعويضات بقا "
وأكملت وأنا أعتدل بجلستي :
_ " ولا تعليق على أحكام القضاء .. الموضوع كله قالوا انه قضاء وقدر "
هز رأسه عدة مرات , ثم نظر لي مباشرة وقال :
_ " يبقا قرروا يلبّسوا الليلة لربنا "
و أنطلق في ضحك متصل , أنهاه , بعد فاصل من الكحة المتحشرجة , ببصقة مستديرة على الأرض .

هناك 9 تعليقات:

FreeKiller يقول...

أخيرا الامتحانات خلصت عشان أعرف أقرالك تاني
و يمكن كمان ألحق أكون أول تعليق


هقول إيه بس
انت دست عالجرح
ربنا يهديهم
يا يخفيهم

Zanooba (Zeinab sab9n) يقول...

السلام عليكم ،
يعني بجد الواحد مش عارف يقول إيه ....يعني لا عزاء لأهل الضحايا...كل المصايب دي 1000 واحد و في الآخر قضاء و قدر ...معرفش أي قضاء و أي قدر ؟؟!! فعلاً في الآخر بالحكم ده خلوا المسئولية على ربناس.
انا عندي أقتناع إن الحاجة العدلة اللي عندنا !!!و ختام الكلام دعاء...يا رب
ياتهديهم
ياتخدهم
حياك الله ...مدونتك جميلة

غير معرف يقول...

لعبتك اللي بتبرع فيها كالعادة.. :)
أحييك يا بني..

Ihab Omar يقول...

يخرب بيت شيطانك
نفسي اعرف الناس كانت متوقعة ايه ؟؟ ان النظام يدين نفسه ؟؟
الراجل عضو في اكثر من لجنة حزبية قريبة من السيد نجل الرئيس , و عضو جميعة جيل المستقبل التي تدير الحزب الوطني , و عضو مجلس الشوري
نقول لكم ايه تاني عشان تعرفوا انه الحكومة !!
ربنا يرحم شهدائنا في احدث السفينة
علي فكرة من فترة بسيطة حكم القضاء - الشامخ طبعا - ببراءة سفاح اخر يخصوص اكياس الدم الملوثة , و لكننا كعادتنا عاطفيين حتي في الحق , لم ينتبه احد الي هذه الجريمة و لكن صعب علينا منظر اهالي ضحايا السفينة , انها لعبة الاعلام يا صديقي
ما نراه علي الشاشة هو ما نتعاطف معه , اما ما نقرأ عنه او نعرف عنه بعيدا ً عن لغة الاعلام فهو لا شئ .. مع العلم ان قضية اكياس الدم كان ضحيتها اطفال نقل لهم الدم الملوث
عموما ً .. هي كلها مصايب وراها رجال مسنودة من الحكومة

روز يقول...

شفتش انت قلة الأدب دي؟ فعلا هبل في الجبل
قمة قلة الأدب والاستهانة بالناس، أحياء أو أموات
...
قلة أدب
...
بس مرحبا بعودتك إلى الكتابة :)

غير معرف يقول...

أول عمل أدبى اقرأه بعد هذا الحكم الذى لا أستطيع وصفه غير أنى ذهلت عندما سمعته ...
عمل جميل يا أحمد ويعبر بحق عما نحسه بخصوص هذا الكلام الفاضى الذى حدث ..

baksho

غير معرف يقول...

ماذا نقول????!!!.... شئ متوقع طبعا, وعلى رأى ابراهيم عيسى: الحكاية لم تعد فساد إدارة, بل أصبحت إدارة فساد !!!!1

و لكن ما لا أتوفعه أن تمر الحكاية بتلك السهولة.... أهالى الضحايا معظمهم من الصعيد... و كما قال بعضهم فى (الدستور) بالأمس : لن يذهب دم أولادنا هدرا !!!... ربنا يستر

و فعلا كما قال ايهاب .... لم ينتبه احد ايضا الى فضية أكياس الدم الملوثة هذه.... يبدو ان صاحبها واصل أكتر


أو يمكن ربنا بيحبه!!!!!!!!!!!1



تحياتى

أحمد جمال يقول...

freekiller :


بقالك كتير ما جيتيش هنا
:)

نورتيني



** ** ** **

zanooba :


أولاً مرحب بيكي , وشكراً على رأيك الجميل ..
ما هو مشكلة القضاء والقدر أنها جملة مطاطة اوي , يعني أنا ممكن أقتنع أن دا قضاء وقدر لو كل الإحتياطات تم إتخاذها , ومفيش مسئولية على أي حد , ومحدش قصر في أداء عمله , ساعتها هقول دا فعلاً قضاء وقدر ,
لكن لما يكون العكس على طول الخط هو الصحبح , هو قضاء وقدر آة , بس في واحد غلطان هنا , وهو بقا قضاءه وقدره إنه يتعاقب ..

دا أسمه فساد ذمم , مش قضاء وقدر

وأتوقع أن الشطر التاني من الدعاء هو اللي ممكن يتحقق
موضوع الهدى دا صعب شويتين



** ** ** **

geraldine :


تسلمي يا داليا ..

أحمد جمال يقول...

إيهاب عمر :


عن نفسي يا إيهاب أنا مكنتش متوقع حاجة خالص .. بطلت يابني حكاية التوقع والإستنباط والإستدلال وكل الكلام دا ..

موضوع أكياس الدم لم يحصل على نفس الإهتمام لسبب بسيط , أن البني آدم العادي بيتأثر أكتر بالأحداث اللي لها نتيجة مباشرة وواضحة ,يعني مسألة تلوث الأكياس _بغض النظر عن صحة هذا من عدمه_ صعب أن الواحد يحس بيها زي "حادثة" بحجم غرق عبارة فيها عدد رهيب من الناس ..

الحاجة التانية بقا , هو مدى خطورة الموضوع , الأكياس لم تكن ملوثة , الأكياس كانت غير مطابقة للمواصفات , يعني زي ما إحنا بنقول كدا , حاجة زي أن صيدلي يبيع دوا صلاحيته منتهية , دي هو غالباً هيتعاقب عليها , بالرغم أن الدوا مش هيبقا مضر بعد فترة إنتهاء الصلاحية لحد فترة معينة .. دي إجراءات وقائية ..
ودا مش معناه أن دي حاجة بسيطة , بس مش موضوعها الرأي العام

لكن قضية بحجم العبارة دي كارثة ..



** ** ** **

حنين :


دي مش قلة أدب .. دي قلة كل حاجة ..

أما عن عودتي إلى الكتابة , فأنا مكنتش متوقف أصلاً , كما أن الموت لا يستطيع أن يقهر ريتشارد قلب الأسد

:)



** ** ** **

baksho :


تسلم يا رب .. رأيك فرحني بجد يا أحمد



** ** ** **

عمرو :


هو غالباً ربنا بيحبه
:)

نورت يا عمرو

المتابعون